“Azərbaycanın müxtəlif mövzularda beynəlxalq konfranslara və forumlara ev sahibliyi etməsi ənənə halını alıb. Aprelin 9-da ölkəmiz yenidən dünyanın diqqətini özünə yönəltdi. Belə ki, ADA Universitetində ənənəvi olaraq keçirilən beynəlxalq tədbirlər sırasına daha biri əlavə olundu. Cənab Prezident İlham Əliyevin iştirakı ilə “Yeni dünya nizamına doğru” Forumu keçirildi. Bu mühüm platforma xarici ekspertlərə dünyada baş verən proseslər, Ermənistanla münasibətlərin tənzimlənməsi prosesi, eləcə də Azərbaycanın Qoşulmama Hərəkatına sədrlik etdiyi müddətdə dünya üçün buraxdığı irsin müzakirəsi baxımından əlverişli imkan yaratdı. Cənab Prezident İlham Əliyevin dediyi kimi, “Müxtəlif ölkələrdən olan beynəlxalq ekspertlərin böyük bir qrupu qlobal gündəlikdə duran mühüm məsələləri müzakirə etmək üçün Azərbaycanı yeddinci dəfədir ki, ziyarət edir. Eyni zamanda, bütün bu səfərlər Azərbaycanı daha da yaxşı tanımağa, ölkənin nəbzini tutmağa xidmət edir. Azərbaycanın tarixi ərazilərinin azad edilməsindən sonra beynəlxalq ekspertlərin həmin ərazilərə müntəzəm səfərləri onlara ölkəmizin tarixi haqqında daha dolğun məlumat verir.” kimi fikirləri ilə beynəlxalq tədbirlərin əhəmiyyətini açıqladı. Bir daha qeyd olundu ki, regionda vəziyyət dəyişir və böyük dərəcədə dəyişikliklərin təşəbbüskarı Azərbaycandır.”

Bu sözləri aia.az-a verdiyi açıqlamasında Milli Məclisin deputatı Səttar Möhbalıyev deyib.

Fikirlərini davam etdirən millət vəkili bildirib ki, dövlət başçısının hər bir çıxışı Azərbaycan həqiqətlərinin təbliğində zəngin mənbədir: “Bu baxımdan cənab Prezident İlham Əliyevin Forumdakı çıxışı da biri-birindən mühüm məqamları, çağırışları, Ermənistana və havadarlarına ünvanlanan mesajları ilə diqqətdə oldu. 30 illik işğal, 44 günlük Vətən müharibəsi, postmünaqişə dövrünün reallıqları, Azərbaycan-ABŞ, Azərbaycan-Türkiyə və Azərbaycan-İsrail münasibətləri barədə Forum iştirakçılarına geniş məlumat verən dövlətimizin başçısı dedi: “Hesab edirəm ki, bu gün Azərbaycanın reallığını rayonlara səfər ən yaxşı nümayiş etdirir. Xüsusilə dağıdılmış və ermənilərin işğal etdiyi rayonları nəzərdə tuturam. İndi mən müzakirələrin aparılmasına daha çox vaxtın ayrılması üçün giriş nitqimi yekunlaşdıracağam. Əminəm ki, dünənki və bugünkü müzakirələr və ekspertlər arasında qarşılıqlı əlaqələr bizə birgə yanaşmaları hazırlamağa və keçən dəfə, ötən il görüşdüyümüzdən bəri tamamilə fərqli olan sürətlə dəyişən dünya ilə bağlı fikirlərimizin mübadiləsinə kömək edəcək.” Xəzər dənizin şərq sahillərindəki dövlətlərlə, o cümlədən Yaxın Şərq dövlətləri ilə münasibətlərin yüksək səviyyədə qurulduğunu bildirən ölkə başçısı bildirmişdir ki, Avropa ölkələri ilə uzunmüddətli əməkdaşlığa gəldikdə, bu ölkələrin bir çoxu ilə Azərbaycan strateji tərəfdaşlıq haqqında Bəyannamə imzalayıb və ya qəbul edib. Beləliklə, artıq qurulmuş bu platforma bizə Mərkəzi Asiya və Avropa regionu arasında coğrafi, siyasi, iqtisadi və nəqliyyat körpüsü olaraq önəmli rol oynamağa imkan verir. Biz indi istər Avropa İttifaqı və ya Amerika Birləşmiş Ştatları olsun, istərsə də digər beynəlxalq təşkilatlar olsun, Qərbdən Mərkəzi Asiyaya və əlbəttə ki, həmin regionla uzunmüddətli əməkdaşlığın qurulmasının planlaşdırılmasına böyük marağın olduğunu bilirik. Azərbaycanın nəzərə alınmamasının mümkünsüz olduğunu anlamaq üçün, sadəcə, xəritəyə nəzər salmaq kifayət edər.”
Daha sonra S.Möhbalıyev ölkəmizin bütün məsələlərdə prinsipial mövqelərdən çıxış etdiyini diqqətə çatdırdı: “Minsk qrupunun artıq heç bir işə yaramadığını qeyd edən cənab Prezident bu qurumun buraxılması zərurətini qeyd edərək bildirdi ki, Ermənistan dırnaqarası dostlarının pis məsləhətinə qulaq asmaqdansa vaxtı çatmış məsələnin həllinə çalışmalı, Azərbaycana qarşı ərazi iddialarından və revanşist davaranışlardan əl çəkməlidir. Əks təqdirdə, yenə də Ermənistan itirəcək. Azərbaycanın Qoşulmama Hərəkatına 4 il sədrlik etdiyini və müsbət nəticələr əldə edildiyini qeyd edən ölkə başçısı bildirdi: “Bu onu göstərir ki, üzv dövlətlər arasında müəyyən ikitərəfli və ya çoxtərəfli anlaşılmazlıqların olmasına baxmayaraq, - hansı ki, başadüşüləndir – çünki 120 ölkə var, - Azərbaycana münasibətdə onların hamısı bizim rolumuzun qiymətləndirilməsində vahid mövqedən çıxış etmişdi.” Azərbaycanın Türk dünyası ölkələri arasında əməkdaşlıq zamanı çox mühüm rol oynamış ölkə olduğunu bildirən cənab İlham Əliyev bundan sonra da əməkdaşlığın inkişafında bütün tədbirlərin görüləcəyini bildirmişdir. Forumda cənab Prezidentin çıxışı qlobal problemlərin yaşandığı bir zamanda ölkəmizin mövqeyi və hadisələrə dolğun siyasi münasibəti ilə diqqəti çəkmişdir. Xüsusilə vurğulandı ki, Azərbaycanın ardıcıl və qətiyyətli mövqeyi sülhə və inkişafa xidmət edir” – deyə, Səttar Möhbalıyev fikirlərini tamamlayıb.