2025-ci ildə İqtisadi Əməkdaşlıq Təşkilatının (ECO) 17-ci Zirvə Görüşünün Qarabağ torpağında — Xankəndidə keçirilməsi sadəcə bir beynəlxalq tədbir deyil, çox dərin tarixi, siyasi və simvolik məna daşıyır. Bu hadisə Azərbaycan xalqı və dövləti üçün qürurverici olmaqla yanaşı, beynəlxalq ictimaiyyətə də mühüm mesaj verir: Qarabağ Azərbaycandır və bu torpaqlar artıq sülhün, quruculuğun və inkişafın rəmzinə çevrilib.
Uzun illər işğal altında olan Xankəndi 2020-ci ildə Vətən müharibəsində əldə edilən şanlı qələbə ilə Azərbaycan dövlətinin tam nəzarətinə qaytarıldı. Bugünkü Zirvə Görüşünün məhz bu şəhərdə keçirilməsi, işğaldan azad olunmuş ərazilərin siyasi və iqtisadi həyatımıza necə sürətlə inteqrasiya etdiyini göstərir. Xankəndi artıq təkcə tarixi deyil, həm də çağdaş Azərbaycanın bir parçası kimi öz yerini alır.
Zirvə görüşünün Qarabağda keçirilməsi region ölkələri üçün həm də yeni əməkdaşlıq imkanlarının açılması deməkdir. Qarabağ iqtisadi baxımdan geniş potensiala malikdir: kənd təsərrüfatı, turizm, enerji və nəqliyyat sahələrində böyük imkanlar mövcuddur. Bu baxımdan Xankəndi kimi bir şəhərdə beynəlxalq tədbirin təşkili ECO üzv ölkələrinə Azərbaycanın sülh və inkişaf vizyonunu təqdim edir.
Bu tədbir, eyni zamanda, beynəlxalq ictimaiyyətə verilən güclü siyasi mesajdır: Azərbaycan öz suveren ərazilərində tam hökmrandır və bu torpaqlarda artıq silah səsi deyil, beynəlxalq əməkdaşlıq səsləri eşidilir. Xankəndidə təşkil olunan zirvə görüşü xalqımızın iradəsinin, dövlətimizin gücünün və diplomatiyamızın uğurunun parlaq nümunəsidir. Bu, həm də milli həmrəyliyin, xalq-iqtidar birliyinin təntənəsidir.
Zirvə görüşü çərçivəsində Xankəndini ziyarət edən xarici qonaqlar şəhərin necə sürətlə bərpa olunduğunun şahidi oldular. Yollar, məktəblər, sosial obyektlər, yeni tikililər — bütün bunlar Azərbaycanın Qarabağ üçün qurduğu gələcəyin reallıqlarıdır. Bu mənzərə regionun inkişafına töhfə verməyə hazır olan tərəfdaş ölkələr üçün də cəlbedici perspektivlər açır.
Bugünkü Zirvə Görüşünün Qarabağda, Xankəndidə təşkili təkcə iqtisadi əməkdaşlıq üçün bir platforma deyil, həm də Azərbaycanın ərazi bütövlüyünün, suverenliyinin və qələbəsinin simvoludur. Bu tədbir Qarabağın sülh və əməkdaşlıq mərkəzinə çevrilməsi yolunda atılmış mühüm addımdır. Bugünkü Zirvə Görüşünün Qarabağda, Xankəndidə Təşkil Edilməsinin Xüsusi Mənası Var. Xankəndi bu gün sadəcə bir şəhər deyil — o, dirçələn Qarabağın, qalib Azərbaycanın rəmzidir.

107 nömrəli tam orta məktəbin tarix müəllimi: İbişli Qurban