MİLLİ QÜRURUN VƏ TARİXİ ƏDALƏTİN TƏNTƏNƏSİ: İYİRMİ İLLİK STRATEJİ YOLUN ZƏFƏR TƏCƏSSÜMÜ
Dünya hərb və diplomatiya tarixi sübut edir ki, ərazi itkisi ilə üzləşmiş xalqların yenidən dirçəlməsi, torpaqlarını geri qaytarması və dövlət suverenliyini tam bərpa etməsi təsadüflərin deyil, dəmir iradənin, illərlə hesablanmış dəqiq strategiyanın və xalq-iqtidar vəhdətinin nəticəsidir. Azərbaycanın son iyirmi ildən artıq dövrü əhatə edən müasir dövlətçilik salnaməsi məhz belə bir titanik mübarizənin, milli qürurun bərpasının əyani nümunəsidir.
Azərbaycan Respublikasının Prezidenti, Müzəffər Ali Baş Komandan cənab İlham Əliyevin “Prezident kimi 2003-cü ildən bu günə qədər bütün addımlarım Azərbaycanın gücləndirilməsinə yönəldilmişdir. Vətən müharibəsinə qədər bütün addımlarım bir amala xidmət edirdi ki, biz torpaqlarımızı azad edək, düşməni torpağımızdan qovaq və biz buna nail olduq” fikirləri təkcə bir hesabat xarakteri daşımır. Bu sözlər bütöv bir xalqın taleyini dəyişən, regionun geostrateji mənzərəsini yenidən cızan böyük siyasi xəttin ən dolğun fəlsəfəsidir.
2003-cü ildə xalqın mütləq etimadı ilə ali dövlət vəzifəsinə seçilən Prezident İlham Əliyev Ulu Öndər Heydər Əliyevin banisi olduğu strateji inkişaf kursunu keyfiyyətcə yeni mərhələyə yüksəltdi. Həmin dövrdə dövlət başçısının qarşısında duran ən başlıca vəzifə Azərbaycanın hərbi, siyasi və ictimai təzyiqlərə boyun əyməyəcək qədər güclü iqtisadi modelini formalaşdırmaq idi. Məlum idi ki, iqtisadi cəhətdən asılı olan dövlətlər heç vaxt müstəqil qərar qəbul edə və öz milli maraqlarını hərbi müstəvidə sonadək qoruya bilməzlər.
Bu məqsədlə həyata keçirilən nəhəng enerji və nəqliyyat layihələri ölkənin simasını kökündən dəyişdi. Bakı-Tbilisi-Ceyhan neft kəməri, Bakı-Tbilisi-Ərzurum qaz xətti, daha sonra isə Avropanın enerji təhlükəsizliyində strateji halqaya çevrilən Cənub Qaz Dəhlizi Azərbaycanı təkcə regional deyil, qlobal güc mərkəzinə çevirdi. Neft-qaz gəlirlərinin şəffaf idarə olunması, valyuta ehtiyatlarının qorunması və qeyri-neft sektorunun inkişafı ölkəmizin maliyyə dayanıqlığını təmin etdi. Ən başlıcası isə toplanan bu nəhəng potensial birbaşa və sistemli şəkildə yeganə ali məqsədə — ordunun modernləşdirilməsinə, ölkənin müdafiə qabiliyyətinin zirvəyə çatdırılmasına yönəldildi.
Hərbi sahədə aparılan islahatlar sadəcə silah tədarükü ilə məhdudlaşmırdı. Prezident İlham Əliyevin rəhbərliyi ilə Azərbaycan Silahlı Qüvvələri dünyanın aparıcı hərbi standartları səviyyəsinə yüksəldildi. Ən müasir beşinci nəsil PUA-lar, raket-artilleriya kompleksləri, müasir hava hücumundan müdafiə sistemləri və zirehli texnikalar ordu arsenalına daxil edildi. Paralel olaraq, 2005-ci ildə əsası qoyulan Müdafiə Sənayesi Nazirliyi vasitəsilə daxili istehsal gücləndirildi, Azərbaycan öz hərbi sursat ehtiyacının böyük hissəsini yerli imkanlar hesabına ödəməyə başladı.
Lakin ordunun ən mühüm güc mənbəyi texnika deyil, milli ruh və vətənpərvərlik idi. Cənab Prezident İlham Əliyevin hakimiyyəti illərində yetişən gənc nəsil Vətən torpağına sonsuz sədaqət, düşmənə barışmaz nifrət və milli qürur hissi ilə böyüdü. Ali Baş Komandanın hər bir çıxışında aşılanan “Qarabağ Azərbaycandır!” fəlsəfəsi hər bir azərbaycanlının şüuruna həkk olundu. 2016-cı ilin şanlı Aprel döyüşləri və 2020-ci ilin Tovuz hadisələri Azərbaycan Ordusunun nəyə qadir olduğunu düşmənə və bütün dünyaya ilk dəfə aydın şəkildə nümayiş etdirdi.
Müzəffər Ali Baş Komandanın Vətən müharibəsinə qədər atdığı addımların digər mühüm tərkib hissəsi hüquqi-diplomatik cəbhədə aparılan ardıcıl iş idi. Otuz il ərzində Ermənistan rəhbərliyi və onun xaricdəki havadarları status-kvonu qoruyub saxlamağa, danışıqlar prosesini imitasiya etməyə çalışırdılar. Cənab Prezident İlham Əliyev isə bütün beynəlxalq tribunalardan — BMT Baş Assambleyasından tutmuş Davos İqtisadi Forumuna və Münxen Təhlükəsizlik Konfransına qədər — Ermənistanın işğalçı mahiyyətini təkzibolunmaz tarixi faktlar və hüquqi sənədlərlə ifşa etdi.
BMT Təhlükəsizlik Şurasının dörd qətnaməsinin tələblərinin yerinə yetirilməsi, Qoşulmama Hərəkatı, İslam Əməkdaşlıq Təşkilatı, Türk Dövlətləri Təşkilatı və digər beynəlxalq qurumların Azərbaycanın suverenliyini tanıyan bəyanatları ölkəmizin beynəlxalq hüquq müstəvisindəki mövqeyini sarsılmaz etdi. Bu zəmin sayəsində 2020-ci ilin 27 sentyabrında əks-hücum əməliyyatları başlayanda heç bir xarici qüvvə Azərbaycanı beynəlxalq hüququ pozmaqda günahlandıra bilmədi; dövlətimiz öz ərazisində beynəlxalq səviyyədə tanınmış sərhədlərini bərpa edirdi.
44 günlük Vətən müharibəsi Azərbaycanın iyirmi illik hazırlığının, iqtisadi və hərbi qüdrətinin döyüş meydanında nümayişi oldu. Cəbrayıl, Füzuli, Zəngilan, Qubadlı, Hadrut, Suqovuşan və nəhayət, alınmaz qala sayılan Şuşanın sıldırım qayalar aşılaraq azad edilməsi hərb elminin ən parlaq səhifələrindən birinə çevrildi. 2020-ci il noyabrın 10-da Ermənistanın kapitulyasiya aktına imza atmağa məcbur edilməsi ilə otuz illik işğala son qoyuldu, Ağdam, Kəlbəcər və Laçın bir güllə belə atılmadan geri qaytarıldı.
Ali Baş Komandan bununla da kifayətlənmədi. 2023-cü ilin sentyabrında həyata keçirilən cəmi 23 saatlıq lokal antiterror tədbirləri ilə Qarabağdakı separatçı xunta rejimi birdəfəlik məhv edildi, qanunsuz hərbi birləşmələr tərk-silah olundu. 15 oktyabr 2023-cü ildə Cənab Prezident İlham Əliyevin Xankəndi şəhərinin mərkəzində ucaltdığı üçrəngli dövlət bayrağımız Azərbaycanın dövlət suverenliyinin hər bir qarış torpağımızda bərpasının rəmzi oldu. Bu, 2003-cü ildə verilən tarixi vədin tam şəkildə yerinə yetirilməsi idi.
Bu gün Azərbaycan təkcə müharibədə qalib gəlmiş ölkə deyil, həm də işğaldan azad edilmiş geniş torpaqları görünməmiş sürətlə dirçəldən qüdrətli bir dövlətdir. Qarabağ və Şərqi Zəngəzurda inşa edilən beynəlxalq hava limanları, "Zəfər yolu", tunellər, elektrik stansiyaları, “Ağıllı kənd” və “Ağıllı şəhər” konsepsiyaları düşmənin viran qoyduğu torpaqlara yeni həyat gətirir. “Böyük Qayıdış” proqramı çərçivəsində doğma yurdlarına qayıdan keçmiş məcburi köçkünlərin gözlərindəki sevinc göz yaşları isə bu zəhmətin ən böyük mənəvi mükafatıdır.
Dövlət başçısının qeyd etdiyi kimi, atılan hər bir addım məhz bu gün üçün, torpaqlarımızın azadlığı və dövlətimizin əbədi müstəqilliyi üçün atılmışdı. Müzəffər Ali Baş Komandan İlham Əliyevin rəhbərliyi ilə qazanılmış bu tarixi Zəfər Azərbaycan xalqının çoxəsrlik tarixində bənzəri olmayan bir şərəf zirvəsidir və gələcək nəsillər üçün tükənməz qürur mənbəyi olaraq qalacaqdır.
Bakı şəhər 192№-li tam orta məktəbin tarix müəllimi
Aslanova Samirə
