Azərbaycan xalqının ən qədim, ən sevimli bayramlarından biri olan Novruz Bayramı hər il ölkəmizə baharın təravətini, yeniliyin nəfəsini, ümid və bərəkəti gətirir. Bu bayram minilliklər boyu xalqımızın milli kimliyinin, adət-ənənələrinin, birliyinin və torpağa bağlılığının rəmzi olub. Novruz həm də təbiətin oyanışı, həyatın yenidən canlanması, qəlblərə sevinc, ruhlara təzə nəfəs gətirən bayramdır.

Son illərdə isə Novruz Bayramı Azərbaycan xalqı üçün daha böyük anlam daşıyır. Bu gün biz Novruzu azad Qarabağımızda, doğma torpaqlarımızda, illərlə həsrətində olduğumuz diyarlarımızda qeyd edirik. Bu qüruru, bu sevinci bizə qazandıran isə Azərbaycan Respublikasının Prezidenti, Müzəffər Ali Baş Komandan İlham Əliyevin qətiyyəti, uzaqgörən siyasəti və xalqımızın sarsılmaz birliyidir.

44 günlük Vətən müharibəsində əldə olunan şanlı Qələbə ilə torpaqlarımız düşmən işğalından azad olundu, ərazi bütövlüyümüz bərpa edildi. Bu gün azad edilmiş Qarabağda yenidənqurma və bərpa işləri sürətlə davam edir. Prezident İlham Əliyevin rəhbərliyi ilə Qarabağ və Şərqi Zəngəzur bölgəsi bərpa olunur, şəhərlərimiz və kəndlərimiz yenidən qurulur, doğma torpaqlarımıza həyat qayıdır. Artıq azad Şuşada, Füzulidə, Zəngilanda, Laçında Novruz tonqalları qalanır, xalqımız öz ata-baba yurduna qayıdır.

Prezident İlham Əliyev dəfələrlə vurğulayıb ki, "Biz Qarabağı cənnətə çevirəcəyik!". Məhz bu amalla həyata keçirilən layihələr, qurulan yollar, tikilən məktəblər, xəstəxanalar, çəkilən dəmir yolları və hava limanları Azərbaycanın gələcəyinə inamı daha da gücləndirir.

Bu gün Novruz Bayramını həm də Böyük Qayıdışın, xalqımızın birliyinin, dövlətimizin gücünün və torpaqlarımızın azadlığının simvolu kimi qeyd edirik. İlham Əliyevin rəhbərliyi ilə Azərbaycan yeni zirvələrə doğru irəliləyir, ölkəmizin hər qarış torpağı gözəlləşir, güclənir və inkişaf edir.

Qoy bu Novruz bayramı hər bir ocağa ruzi-bərəkət, xoşbəxtlik və firavanlıq gətirsin! Qoy baharın təravəti xalqımıza əbədi sülh, əmin-amanlıq və rifah bəxş etsin!

Novruz Bayramınız mübarək, Azərbaycan! Qarabağımız mübarək!