Azərbaycan bu gün dünya enerji xəritəsində mühüm mövqe tutan, təbii qaz ehtiyatları ilə qlobal bazarda etibarlı tərəfdaş kimi tanınan ölkələrdən biridir. Prezident İlham Əliyevin Slovakiya səfəri zamanı vurğuladığı kimi, Azərbaycanın zəngin qaz yataqları ölkəmizə dünyanın bir çox dövlətlərinə təbii qaz ixrac etmək imkanı yaradır. Bu imkan, həm regionun enerji təhlükəsizliyinə, həm də Avropanın strateji enerji təşəbbüslərinə böyük töhfə verir.

Son illərdə Azərbaycanın qaz resurslarının işlənməsi, yeni yataqların kəşfi və mövcud infrastrukturun genişləndirilməsi nəticəsində ölkəmiz enerji ixracında mühüm artıma nail olub. Hazırda Azərbaycanın təbii qaz ixracı 25 milyard kubmetrə çatır və bunun əhəmiyyətli hissəsi Avropa ölkələrinə yönəldilir. Azərbaycan qazını alan ölkələrin sayı artıq 14-ə yüksəlib ki, bu da ölkəmizin enerji bazarındakı nüfuzunu daha da möhkəmləndirir.

Slovakiya ilə enerji sahəsində əməkdaşlıq da xüsusi qeyd olunmalıdır. Son iki il ərzində Slovakiya ilk dəfə olaraq Azərbaycan qazı ilə təmin edilib və bu əməkdaşlıq qarşıdakı illərdə daha da genişlənəcək. Yeni qaz yataqlarının işlənməsi və əlavə resursların yaranması sayəsində Slovakiya və onun qonşu ölkələri üçün təchizatın daha böyük həcmdə artırılması real perspektiv kimi görünür.
Azərbaycanın enerji siyasətinin ən güclü tərəfi ondan ibarətdir ki, ölkə yalnız resurs ixracatçısı kimi çıxış etmir, həm də Şərqlə Qərb arasında strateji enerji körpüsü rolunu oynayır. Azərbaycan ərazisindən keçən boru kəmərləri -Cənub Qaz Dəhlizi, TANAP, TAP-Avropanın enerji təhlükəsizliyində həlledici əhəmiyyət daşıyır. Bu infrastruktur təkcə mövcud tələbləri ödəmək deyil, həm də gələcəkdə artan ehtiyaclara cavab vermək gücünə malikdir.

Həmçinin, ölkədə enerji potensialının genişləndirilməsi ilə paralel olaraq yeni sahələr-data mərkəzləri, süni intellekt infrastrukturu və yüksək texnologiyalar üçün əlverişli şərait yaradılır. Azərbaycanda istifadə olunmayan enerji potensialının 2 giqavata çatması və yaxın beş ildə 8 giqavata qədər yüksələcəyi bu istiqamətdə böyük imkanlar açır.
Azərbaycanın zəngin qaz yataqları təkcə ölkəmizin iqtisadi inkişafını təmin etmir, həm də Avropanın enerji təhlükəsizliyində mühüm rol oynayır. Artan ixrac imkanları, güclü infrastruktur və yeni yataqların işlənməsi Azərbaycanın dünya enerji bazarında etibarlı tərəfdaş statusunu daha da möhkəmləndirir. Bu gün ölkəmiz enerji sahəsində yalnız istehsalçı deyil, həm də qlobal əməkdaşlıq və təhlükəsizlik proseslərinin fəal iştirakçısı kimi çıxış etməkdədir.

Rəvanə Kərimova,
Nəsimi Rayon Gənci.