ABŞ kəşfiyyatı Rusiyanın itkilərini AÇIQLADI - Nüvə triadasına BÖYÜK ZƏRBƏ
Amerika kəşfiyyatının məlumatına görə, iyunun 1-də Ukraynanın Rusiya hərbi aerodromlarına endirdiyi hava zərbələri nəticəsində 20 təyyarə sıradan çıxarılıb.
Bu barədə "Reuters" agentliyi amerikalı rəsmilərə istinadən məlumat yayıb.
Məlumatda bildirilir ki, təyyarələrdən təxminən 10-u tamamilə məhv edilib, digərləri isə zədələnib.
Qeyd edək ki, açıqlanan rəqəm Ukrayna prezidenti Volodimir Zelenskinin verdiyi məlumatdan aşağıdır. Belə ki, Zelenski hücum zamanı 41 hərbi təyyarənin zədələndiyini, onlardan yarısının isə bərpaolunmaz olduğunu bildirib.
"Reuters"in mənbələri bu əməliyyatın əhəmiyyətini vurğulayıblar. Onlardan biri ehtimal edib ki, nəticədə Rusiya atəşkəs danışıqlarında mövqeyini daha da sərtləşdirəcək.
Agentlik yazır ki, Ukrayna pilotsuz uçuş aparatlarının hücumundan sonra çəkilmiş peyk görüntülərində Rusiya tərəfindən Ukraynaya raket zərbələri endirmək üçün istifadə olunan "Tu-95" və "Tu-22" bombardmançı təyyarələrinin zədələndiyi görünür.
Amerikalı rəsmilər bildiriblər ki, ABŞ Ukraynadan bu hücumlarla bağlı əvvəlcədən heç bir məlumat almayıb. ABŞ prezidentinin Ukrayna üzrə xüsusi nümayəndəsi Kit Kelloq çərşənbə axşamı verdiyi televiziya müsahibəsində xəbərdarlıq edib ki, "Hörümçək toru" adlı əməliyyat münaqişənin eskalasiyası riskini kəskin artırıb. Çünki Ukrayna Rusiyanın "nüvə triadasının" dayaqlarından birinə zərbə endirib.
