Füzuli rayonu Azərbaycan tarixinin ən ağrılı, eyni zamanda ən şərəfli səhifələrindən birini yaşayıb. Uzun illər düşmən işğalı altında qalan bu qədim torpaq təkcə coğrafi məkan deyil, həm də xalqımızın yaddaşında əbədi yaşayacaq bir tarix, bir vətən hissi idi. İşğal dövründə Füzuli viranəyə çevrilmiş, doğma sakinləri öz yurd-yuvalarından didərgin düşmüşdülər. Lakin bu torpaq heç vaxt unudulmadı. O, hər zaman azərbaycanlıların qəlbində yaşadı və qayıdış gününü səbirsizliklə gözlədi.
44 günlük Vətən müharibəsi xalqımızın qürur tarixidir. Müzəffər Ali Baş Komandan İlham Əliyevin rəhbərliyi və rəşadətli Azərbaycan Ordusunun qəhrəmanlığı nəticəsində 2020-ci il oktyabrın 17-də Füzuli şəhəri işğaldan azad edildi. Bu, təkcə bir rayonun azadlığı deyildi; Azərbaycan xalqının iradəsinin, gücünün və birliyinin təntənəsi idi. Füzulinin azad olunması Qarabağda böyük qələbənin mühüm mərhələlərindən biri kimi tarixə düşdü.
İşğaldan sonra Füzuli rayonunda genişmiqyaslı bərpa və yenidənqurma işlərinə başlanıldı. Yeni yollar, yaşayış məhəllələri və sosial infrastruktur layihələri həyata keçirildi. Füzuli Beynəlxalq Hava Limanının istifadəyə verilməsi bölgənin nəqliyyat imkanlarını genişləndirdi və Qarabağın inkişafına yeni töhfə verdi. Məktəblərin, xəstəxanaların və digər sosial obyektlərin tikilməsi insanların doğma yurda qayıdışı üçün mühüm şərait yaradır.
Füzulinin bərpası yalnız binaların və yolların yenidən qurulması demək deyil. Bu, həm də uzun illər yurd həsrəti çəkən insanların doğma torpaqlarına qayıtması, kəndlərin dirçəlməsi və həyatın yenidən canlanmasıdır. Bölgənin təbii sərvətləri, əlverişli coğrafi mövqeyi və iqtisadi potensialı nəzərə alınaraq burada müasir şəhər infrastrukturu yaradılır, kənd təsərrüfatı və digər iqtisadi sahələrin inkişafı üçün imkanlar genişləndirilir.
Füzuli həm də milli ruhun, vətən sevgisinin və tarixi yaddaşın rəmzidir. Şəhidlərimizin qanı və qazilərimizin fədakarlığı bahasına azad edilən bu torpaq bu gün yenidən qurulur. Burada aparılan işlər yalnız Füzulinin sakinləri üçün deyil, bütövlükdə Azərbaycanın gələcəyi üçün böyük əhəmiyyət daşıyır. Füzulinin dirçəlişi Qarabağın bərpasına, ölkəmizin ərazi bütövlüyünün möhkəmlənməsinə və milli birliyimizin güclənməsinə xidmət edir.
Bu gün Füzuli keçmişin ağrılarını arxada qoyaraq gələcəyə inamla addımlayan şəhərdir. Onun yenidən qurulması Azərbaycan dövlətinin gücünü, xalqımızın əzmini və quruculuq iradəsini nümayiş etdirir. Füzuli bundan sonra da Zəfərin, qayıdışın və bərpanın rəmzi kimi yaşayacaq, gələcək nəsillərə Vətənə bağlılığın və mübariz ruhun nümunəsi olacaq.

Ceyhun Sadizadə
Maştağa qəsəbəsi 28 nömrəli məktəbin coğrafiya müəllimi