Azərbaycan Respublikasının Prezidenti, Müzəffər Ali Baş Komandan İlham Heydər oğlu Əliyev müasir tariximizin ən güclü siyasi liderlərindən biridir. Onun dövlətçilik kursu, qətiyyətli və uzaqgörən siyasəti Azərbaycanı regionun lider dövlətinə çevirmiş, xalqın rifahı və ölkənin inkişafı üçün möhkəm təməl yaratmışdır.

İlham Əliyev, hər şeydən əvvəl, xalqını sevən və onun maraqlarını daim ön planda saxlayan bir liderdir. Onun həyata keçirdiyi siyasətin mərkəzində Azərbaycan vətəndaşı dayanır. Sosial layihələr, iqtisadi inkişaf proqramları, yeni iş yerlərinin açılması, təhsil və səhiyyə sahəsinə göstərilən xüsusi diqqət bunu bir daha sübut edir. Prezident daim xalqa yaxın olması ilə seçilir, onun hər bir addımı vətəndaşların rifahını yaxşılaşdırmağa yönəlib.

Müasir Azərbaycanın qüdrətli Ali Baş Komandanı kimi İlham Əliyevin adı tarixi Zəfərimizlə bir sırada çəkilir. 2020-ci ildə 44 günlük Vətən müharibəsində onun dəmir iradəsi, sarsılmaz qətiyyəti, qlobal miqyasda apardığı uğurlu diplomatik mübarizə və Azərbaycan Ordusuna göstərdiyi yüksək diqqət sayəsində torpaqlarımız işğaldan azad olundu. Bu qələbə Azərbaycan xalqının əsrlər boyu arzuladığı tarixi ədalətin bərpası oldu və ölkəmizin gücünü bütün dünyaya nümayiş etdirdi.

Prezident İlham Əliyev şəhid ailələrinə, qazilərə və müharibə iştirakçılarına göstərilən xüsusi diqqəti ilə də hər zaman seçilir. Onun tapşırığı ilə bu qəhrəmanlarımızın sosial müdafiəsi gücləndirilir, onlara yeni mənzillər, avtomobillər təqdim olunur, sağlamlıqlarının bərpası üçün bütün imkanlar yaradılır. Dövlət başçısının bu humanist addımları, şəhid ailələrinə göstərilən qayğı və hörmət Azərbaycan xalqının birliyinin və həmrəyliyinin möhkəmlənməsinə böyük töhfə verir.

Ölkəmizin inkişafı, modernləşdirilməsi və gücləndirilməsi istiqamətində İlham Əliyevin gördüyü işlər danılmazdır. Onun rəhbərliyi ilə Azərbaycan iqtisadiyyatı sürətli inkişaf mərhələsinə qədəm qoyub, yeni enerji layihələri, infrastruktur proqramları, beynəlxalq əməkdaşlıq imkanları həyata keçirilib. Bakı beynəlxalq tədbirlərin, qlobal forumların və idman yarışlarının mərkəzinə çevrilib. Azərbaycanın beynəlxalq nüfuzu hər ötən gün daha da artır.

Prezident İlham Əliyev yalnız siyasətçi deyil, həm də dövlətini qəlbdən sevən, xalqının rifahı üçün gecə-gündüz çalışan, daim ölkəsini irəliyə aparan müdrik liderdir. Onun rəhbərliyi ilə Azərbaycan bu gün regionda söz sahibi, dünya miqyasında isə etibarlı tərəfdaş kimi tanınır.

İlham Əliyev – güclü siyasətçi, qətiyyətli lider, xalqını sevən Prezident, müzəffər Ali Baş Komandan və dövlətimizin parlaq gələcəyinin təminatçısıdır.