Binəqədi rayonu – Bakı şəhərinin ən böyük və dinamik inkişaf edən inzibati ərazilərindən biri olmaqla yanaşı, həm də müxtəlif sosial qrupların sıx yaşadığı, strateji əhəmiyyətə malik bir bölgədir. Belə mürəkkəb və çoxşaxəli idarəetmə mühiti isə güclü liderlik, çevik qərarvermə qabiliyyəti və vətəndaşla səmimi təmas tələb edir. Məhz bu amilləri özündə birləşdirən, dövlətçiliyə sadiqliyi və zəngin idarəçilik təcrübəsi ilə seçilən şəxs – Binəqədi Rayon İcra Hakimiyyətinin başçısı Elxan Allahverdiyev bu vəzifəni böyük məsuliyyətlə və uğurla yerinə yetirir.

Elxan Allahverdiyev rayonun sosial-iqtisadi inkişafının təmin olunmasında sistemli və hədəfli yanaşması ilə tanınır. Onun rəhbərliyi ilə Binəqədi rayonunda genişmiqyaslı abadlıq və yenidənqurma işləri həyata keçirilmiş, yaşayış massivlərində yolların yenilənməsi, məhəllələrin abadlaşdırılması, məktəb və uşaq bağçalarının əsaslı təmiri, eləcə də yeni sosial obyektlərin inşası uğurla icra olunmuşdur. Elxan müəllimin hər bir layihəyə şəxsi nəzarəti və detallara verdiyi önəm, onun rəhbərliyini fərqləndirən əsas cəhətlərdəndir.

O, yalnız inzibati tədbirlərlə kifayətlənmir, vətəndaşla birbaşa təmas qurmağa üstünlük verir. Müntəzəm olaraq yerlərdə sakinlərlə görüşlər keçirir, onların problemlərini birbaşa dinləyir və dərhal həlli ilə bağlı tapşırıqlar verir. Bu səmimi yanaşma Binəqədi sakinlərinin öz rayon rəhbərinə olan inamını daha da möhkəmləndirmiş, idarəetmədə şəffaflıq və qarşılıqlı etimad mühiti formalaşdırmışdır.

Elxan Allahverdiyev xüsusilə şəhid ailələri, qazilər və aztəminatlı şəxslərin sosial müdafiəsi sahəsində yüksək həssaslıq nümayiş etdirir. Onun təşəbbüsü ilə rayonda bu kateqoriyadan olan vətəndaşlara mütəmadi qayğı göstərilir, onlara tibbi, psixoloji və maddi dəstək göstərən xüsusi proqramlar həyata keçirilir. Əmək və sosial müdafiə mərkəzləri ilə koordinasiyalı şəkildə görülən bu işlər vətəndaş məmnunluğunu artırmaqla yanaşı, dövlətin sosial siyasətinə yerli səviyyədə layiqli dəstək verir.

Rayonda təmizliyin, ekoloji balansın və yaşıl infrastrukturun qorunması məsələləri də Elxan müəllimin daim diqqətindədir. Onun rəhbərliyi ilə park və xiyabanlar təmir olunur, yeni yaşıllıqlar salınır, tullantıların idarə olunması sahəsində müasir texnologiyalar tətbiq edilir. Eyni zamanda, icra strukturlarında xidmət mədəniyyətinin yüksəldilməsi, məmur-vətəndaş münasibətlərində etik davranış və məsuliyyət prinsiplərinin formalaşdırılması istiqamətində ciddi işlər görülür.

Elxan Allahverdiyev Prezident İlham Əliyevin regionların və paytaxt ətrafı rayonların inkişafına dair verdiyi tapşırıqları əsas götürərək, Binəqədinin hər bir yaşayış sahəsində balanslı və dayanıqlı inkişaf modelini formalaşdırmağa nail olmuşdur. Onun rəhbərliyi ilə təkcə mərkəzi hissələr deyil, Biləcəri, Rəsulzadə, 6-cı mikrorayon, Dərnəgül və digər ərazilər də nəzərəçarpacaq dərəcədə abadlaşdırılmış, infrastruktur baxımından yenilənmişdir.

Elxan Allahverdiyev idarəçilikdə sərt prinsiplərlə yanaşı, insani yanaşması və ziyalı duruşu ilə də seçilir. O, cəmiyyətin bütün təbəqələrini əhatə edən sosial ədalətə əsaslanan qərarlar verir və rayonun ictimai həyatında fəal iştirak edir. Gənclərlə, təhsil işçiləri ilə, ağsaqqallarla daim dialoqda olur, təklifləri dinləyir və hər bir təşəbbüsə hörmətlə yanaşır.

Nəticə etibarilə, Elxan Allahverdiyev Binəqədi rayonunda təkcə icra başçısı deyil – o, həm də vətəndaşın yaxınında olan, onun problemini anlayan və həllinə çalışan dövlət məmurudur. Onun fəaliyyəti dövlətə sədaqətin, xalqa xidmətdə məsuliyyətin və şəhər mədəniyyətinə dərin bağlılığın nümunəsidir. Bu səbəbdəndir ki, Binəqədi günü-gündən yenilənir, inkişaf edir və daha yaşanılası bir rayona çevrilir – bu inkişafın arxasında isə Elxan Allahverdiyev kimi peşəkar və fədakar rəhbərlərin əməyi dayanır.

Binəqədi rayonunda 2 İyul-“Azərbaycan Polisi Günü” və Azərbaycan Polisinin yaranmasının 107-ci ildönümü münasibətilə tədbir keçirildi

02 iyul 2025-ci il tarixində Binəqədi Rayon İcra Hakimiyyətinin inzibati binasında 2 İyul-“Azərbaycan Polisi Günü” və Azərbaycan Polisinin yaranmasının 107-ci ildönümü münasibətilə tədbir keçirildi.

Tədbirdə Binəqədi Rayon İcra Hakimiyyətinin başçı Elxan Allahverdiyev, Yeni Azərbaycan Partiyası Binəqədi rayon təşkilatının sədri Vüsar İsmayılov, millət vəkilləri- Kəmaləddin Qafarov, Rasim Musabəyov, Binəqədi Rayon Polis İdarəsinin rəisi-polis polkovniki İlqar Məmmədov, Binəqədi Rayon Mühafizə İdarəsnin rəisi- polis polkovniki Rəşadət Babayev, Rayon İcra Hakimiyyəti başçısının müavinləri, hüquq-mühafizə orqanlarının rəhbərləri, Rayon İcra Hakimiyyəti başçısı Aparatının və Rayon Polis İdarəsinin məsul əməkdaşları, veteran polis əməkdaşları, qazilər iştirak etdilər.

Tədbir iştirakçıları ümummilli lider Heydər Əliyev adına istirahət parkında ucaldılan abidəsini ziyarət etdilər, abidə önünə gül dəstələri qoyaraq əziz xatirəsini ehtiramla yad etdilər.

Tədbir ümummilli lider Heydər Əliyevin və torpaqlarımızın ərazi bütövlüyü, azadlığı, müstəqilliyi və suverenliyi uğrunda şəhid olmuş igid Vətən oğullarının, polis əməkdaşlarının əziz xatirəsinin bir dəqiqəlik sükutla yad edilməsindən sonra açıq elan olundu.

Binəqədi Rayon İcra Hakimiyyətinin başçısı Elxan Allahverdiyev çıxışında ölkəmizin bütün ərazilərində yüksək peşəkarlıqla dövlətə, xalqa xidmət edən hüquq-mühafizə orqanlarının əməkdaşlarını təbrik edərək qeyd etdi ki, Azərbaycanın daxili işlər orqanlarının həqiqi inkişafı, onların milliləşdirilməsi biləvasitə ulu öndər Heydər Əliyevin adı ilə bağlıdır. Məhz Ulu Öndərin 1969-cu ildə Azərbaycana rəhbər seçilməsindən sonra daxili işlər orqanlarına dövlət qayğısı göstərilməyə, xalqa və xidməti vəzifəsinə sədaqətli olan kadrların irəli çəkilməsinə, əməkdaşların vətənpərvərlik və milli-mənəvi dəyərlər ruhunda tərbiyə edilməsinə, onların peşəkarlıqlarının təkmilləşdirilməsinə diqqət artırılmağa başlanmışdır. Xalqımızın ümummilli lideri  Heydər Əliyev siyasətini əzmlə davam etdirən Azərbaycan Respublikasının Prezidenti cənab İlham Əliyevin milli inkişaf strategiyasında da daxili işlər orqanlarına diqqət, daxili işlər orqanlarında fəaliyyət göstərən əməkdaşların sosial-iqtisadi rifah halının yaxşılaşdırılması, xidməti vəzifələrini layiqincə yerinə yetirən əməkdaşların mükafatlandırılmasına diqqət xüsusi yer tutur. 

Növbəti çıxış edən millət vəkili Kəmaləddin Qafarova polis əməkdaşlarını təbrik edərək qeyd etdi ki, ümummilli lider Heydər Əliyevin 1998-ci ildə imzaladığı Fərmanla 2 iyul tarixi “Azərbaycan Polisi Günü” elan olunub. Dahi Şəxsiyyət Heydər Əliyev hələ Azərbaycana rəhbərliyinin birinci dövründə böyük uzaqgörənliklə daxili işlər orqanlarının təşkilati və ideoloji cəhətdən möhkəmlənməsi, sıralarının saflaşdırılması, peşəkar milli kadrlarla komplektləşdirilməsi ilə bağlı önəmli fərman və sərəncamlar imzalayıb. Bu addımlar Azərbaycanın daxili işlər orqanlarının müstəqillik dövründə ölkəmizdə ictimai-siyasi sabitliyin qorunmasındakı misilsiz xidmətləri ilə yanaşı, ərazi bütövlüyümüzün bərpası uğrunda mübarizədə özünü göstərdi.  

Yeni Azərbaycan Partiyası Binəqədi rayon təşkilatının sədri Vüsar İsmayılov çıxışında daxili işlər orqanları əməkdaşlarının ölkəmizdə siyasi sabitliyin, iqtisadi inkişaf və davamlılığın, demokratiyanın bərqərar olmasında mühüm rol oynadığını qeyd edərək bildiridi ki, Vətən müharibəsində qazanılmış tarixi Zəfərdə polis orqanları və əməkdaşlarının da müstəsna xidmətləri olub. Belə ki, Azərbaycan daxili işlər orqanlarının əməkdaşları öz şücaət və qəhrəmanlıqlarını Vətən müharibəsində, antiterror əməliyyatları zamanı nümayiş etdirərək doğma torpaqlarımızın işğaldan azad edilməsi uğrunda çətin döyüş tapşırıqlarını uğurla yerinə yetirdilər, qəhrəmanlıq salnaməsi yaratdılar.

Binəqədi Rayon Polis İdarəsinin rəisi-polis polkovniki İlqar Məmmədov daxili işlər orqanları əməkdaşlarının hər zaman ölkə rəhbərliyinin diqqət mərkəzində olduğunu və ölkəmizdə cinayətkarlığa qarşı mübarizədə bütün güvvə və bacarıqları ilə dövlətimizə xidmət edəcəklərini qeyd etdi.

Sonda xidməti fəaliyyətində fərqlənən bir qrup polis əməkdaşı Binəqədi Rayon İcra Hakimiyyəti başçısının imzaladığı “Fəxri Fərman”la təltif olundu.

Tədbirin bədii hissəsində Azərbaycan Respublikasının xalq artistləri-Teyyub Aslanovun, Gülyaz Məmmədovanın, Gülyanaq Məmmədovanın, əməkdar artist Nurlan Növrəslinin, İlhamə Qasımovanın, Yaqut Xəlilzadənin ifasında biri-birindən gözəl musiqilər səsləndi, “Odlar yurdu” rəqs ansamblının gözəl rəqsləri nümayiş olundu.